Аталған маңызды іс-шара барысында «Қазақстандық спорт ардагерлері одағы» РҚБ Алматы қаласы филиалының басшысы А.К. Құрғамбаев сөз сөйлеп, филиалдың атқарған жұмыстары бойынша мазмұнды мәлімдеме жасады.
«Қазақстандық спорт ардагерлері одағы» республикалық қоғамдық бірлестігінің
Алматы қаласы филиалының 2025 жылы атқарған жұмыстары туралы баяндамасының толық мәтіні.
2025 жылы «Қазақстандық спорт ардагерлері одағы» республикалық қоғамдық бірлестігінің Алматы қаласы филиалы тарапынан филиалдың ұйымдық тұрғыдан қалыптасуын қамтамасыз етуге, оның құрылымын жүйелеуге, Алматы қаласының спорт ардагерлерін біріктіруге, сондай-ақ қоғамдық, ақпараттық және ұйымдастырушылық қызметтің одан әрі дамуына негіз қалауға бағытталған бірқатар жұмыстар атқарылды.
Филиалдың қызметі Бірлестіктің жарғылық мақсаттары мен міндеттеріне сәйкес жүзеге асырылып, спорт ардагерлері қауымдастығын топтастыруға, мемлекеттік және қоғамдық институттармен өзара іс-қимылды нығайтуға, сондай-ақ дене шынықтыру және спорт саласындағы ұрпақтар сабақтастығын дамытуға бағытталды.
Есепті кезеңде «Қазақстандық спорт ардагерлері одағы» РҚБ Алматы қаласы филиалы ресми түрде құрылды. Осыған байланысты филиалдың ұйымдық құрылымын қалыптастыру, қызметінің басым бағыттарын айқындау және ішкі үйлестіру жұмыстарын жолға қою бойынша тиісті шаралар қабылданды.
Филиал қызметінің маңызды бағыттарының бірі Алматы қаласындағы спорт ардагерлерінің деректер базасын қалыптастыру болды. Осы мақсатта спорт ардагерлерінің тізімі жасалып, олардың тұрғылықты мекенжайлары мен байланыс деректері жүйелендірілді. Аталған жұмыс ардагерлермен тікелей байланыс орнатуға, олармен өзара іс-қимылды күшейтуге және филиал жұмысына кеңінен тартуға мүмкіндік берді.
2025 жылғы 19 қыркүйекте «Сұңқар» трамплиндері базасында Алматы қаласы филиалының спорт ардагерлерімен алғашқы кездесуі ұйымдастырылып, өткізілді. Аталған іс-шараға «Қазақстандық спорт ардагерлері одағы» РҚБ төрағасы Е.Б. Қанағатов қатысты. Кездесу барысында филиалдың негізгі мақсат-міндеттері талқыланып, ардагерлер қауымдастығын біріктіру, олардың өзара байланысын нығайту, алдағы бірлескен жұмыстың негізгі бағыттарын айқындау мәселелері қаралды. Іс-шара аясында қатысушыларға Спорт ардагерлері одағының куәліктері мен құрмет белгілері, сондай-ақ Қазақстан Республикасының спорт министрі Е. Мырзабосыновтың және «Қазақстандық спорт ардагерлері одағы» РҚБ атынан дипломдар мен алғыс хаттар табысталды.
Филиалдың қаржылық-ұйымдастырушылық қызметін қамтамасыз ету мақсатында «Қазақстан Халық Банкі» акционерлік қоғамында Online banking жүйесіне қосылған банктік шот ашылды. Бұл өз кезегінде филиалдың қаржылық операцияларын ашық, жүйелі және тиімді жүргізуге қажетті жағдай қалыптастырды.
Есепті жылы филиалдың фирмалық стилін қалыптастыру және құжат айналымын жетілдіру бағытында да тиісті жұмыстар жүргізілді. Атап айтқанда, Алматы қаласы филиалының фирмалық бланкілерінің дизайны әзірленіп, ресми құжаттаманың бірыңғай үлгісін қалыптастыруға, іскерлік хат алмасу сапасын арттыруға және филиалдың имиджін нығайтуға мүмкіндік жасалды.
Сонымен қатар Алматы қаласы филиалының мүшелері үшін 200 дана төсбелгі дайындалып, алынды. Бұл филиалдың ұйымдастырушылық және өкілдік қызметін жетілдіру бағытындағы маңызды қадамдардың бірі болды.
2025 жылы ақпараттық және цифрлық қызметті дамыту мәселесіне ерекше көңіл бөлінді. Қоғаммен байланысты нығайту, ашықтықты арттыру және филиал қызметі туралы ақпараттың қолжетімділігін қамтамасыз ету мақсатында филиалдың ресми ақпараттық ресурстары іске қосылды. Атап айтқанда, «Қазақстандық спорт ардагерлері одағы» РҚБ Алматы қаласы филиалының ресми сайты — sportardageralmaty.kz, сондай-ақ Instagram әлеуметтік желісіндегі ресми парақшасы — sportardager_almaty ашылып, тұрақты түрде жүргізіле бастады. Бұл ресурстар филиал қызметін жария етуге, жаңалықтар мен алдағы іс-шаралар туралы ақпарат таратуға, сондай-ақ спорт ардагерлері мен жұртшылықпен тұрақты байланыс орнатуға қызмет етуде.
Сондай-ақ Алматы қаласы филиалының салалық кәсіподақпен аударымдар туралы шарт жасасқанын атап өткен жөн. Аталған келісім Алматы қаласындағы спорт мекемелерінің филиал қызметін қаржыландыруға қатысуына мүмкіндік берді.
2025 жылдың қорытындысы бойынша Алматы қаласы филиалының одан әрі тұрақты дамуына қажетті ұйымдық және мазмұндық негіз қаланғанын атап өтуге болады. Атқарылған жұмыстар спорт ардагерлерімен өзара іс-қимылдың негізгі тетіктерін қалыптастыруға, филиалдың институционалдық тұрғыдан орнығуын қамтамасыз етуге және алдағы кезеңдегі қызметтің басым бағыттарын айқындауға мүмкіндік берді.
Алдағы кезеңге арналған басым міндеттердің бірі — Алматы қаласында өткізілуі жоспарланып отырған спорт ардагерлерінің форумын ұйымдастыру мен өткізу жұмыстарына белсенді қатысу. Сонымен қатар Алматы қаласының спорт ардагерлерінің Туризм және спорт академиясының, Алматы мемлекеттік университетінің, әл-Фараби атындағы Қазақ ұлттық университетінің, сондай-ақ дене шынықтыру және спорт бағытындағы факультеттері мен бөлімдері бар өзге де жоғары оқу орындарының студенттерімен кездесулерін ұйымдастыру жоспарлануда.
Аталған іс-шараларды жүзеге асыру ұрпақтар сабақтастығын нығайтуға, спорттық құндылықтарды насихаттауға, спорт ардагерлерінің қоғамдық өмірдегі рөлін арттыруға және жастарға патриоттық тәрбие беруге ықпал ететін болады.
Осылайша, «Қазақстандық спорт ардагерлері одағы» РҚБ Алматы қаласы филиалының 2025 жылғы қызметін ұйымдық тұрғыдан қалыптасу және даму кезеңін табысты өткерген, спорт ардагерлері қозғалысын нығайтуға және спорт саласындағы қоғамдық маңызы бар бастамаларды ілгерілетуге бағытталған нәтижелі жұмыс ретінде бағалауға болады.
